Tłōmaczynie je yno dlo Twojigo wygodnictwa. Niy je prawnie wiōnżōnce — polski ôryginał to jedyno ważno wersyjo tego dokumyntu.

Regulamin sklepu artinspiro.pl — po naszymu

Fungować zaczyno ôd 03.10.2026

1. Ôgólne porachunki

1.1. Tyn regulamin czorno na biołym ôkreślo, jak sie korzysto ze sklepu internetowego pod adresōm artinspiro.pl (dalij: „Sklep” abo „Serwis”).

1.2. Gospodorzym Sklepu i Sprzedawcōm je: Justprint – Marek Nadolny, ul. Bartosza Głowackiego 10, 41-100 Siymianowice Ślōnskie, NIP: 6342389872, REGON: 276988977 (dalij: „Sprzedawca”). Coby urzyndy sie niy ciepały — wszyjsko podane.

1.3. Kōntakt ze Sprzedawcōm: e-mail biuro@artinspiro.pl, telefōn 796 333 876.

1.4. Zamawiać mogōm chopy i baby (ôsoby fizyczne), firmy i inksze jednostki bez ôsobowości prawnyj z terenu Polski — byle podali prawdziwe dane, kere sōm potrzebne do zrobiynio zamōwiynio (dalij: „Klijynt”).

1.5. Kōnta zakładać niy trzeba — zamawiosz bez cołkigo tego rabanu z hasłami.

1.6. Administratorym Twojich danych ôsobowych je Sprzedawca. Jak tego pilnujymy, szkryflo ôsobno Polityka prywatności.

1.7. Sprzedawca mo prawo zmiynić ôferta, cynnik i tyn regulamin. Zmiany niy dotykajōm zamōwiyń złożōnych, zanim weszły w życie.

2. Towary i zamōwiynia

2.1. Towary w Sklepie sōm dwojakie: (a) gotowe, ze stałymi miarami i cynami z katalogu, ôraz (b) robiōne na miara Klijynta i/abo z musterym, farbōm abo włosnōm grafikōm, kero Klijynt wybroł.

2.2. Klijynt wybiero towar, miary i (jak trza) muster abo farba, ciepie to do koszyka, a potym posyło zamōwiynie Sprzedawcy razym z danymi potrzebnymi do roboty (kōntakt, adresa dostawy abo info, że przidzie samymu).

2.3. Póki płacynie ônline niy fungiuje na sto procynt, zamōwiynia możymy tyż klepnōńć telefōnicznie abo mailym — Sprzedawca sie ôdezwie, coby potwierdzić szczegōły, cyna i termin.

2.4. Jak złożysz zamōwiynie, to tak, jakbyś pedzioł „ja, akceptuja tyn regulamin, podano cyna i parametry towaru”.

2.5. Jak robimy z Twojij grafiki abo podle wskazanego mustra, Sprzedawca może przed robotōm pokozać podglōnd do akceptacyje. Czas roboty liczymy wtedy ôd klepniyncio ôstatnij wersyje projektu.

2.6. Sklep może ôdmōwić roboty, jak przesłane grafiki łōmiōm prawo abo prawa inkszych ludzi.

2.7. Do kożdego zamōwiynio Sprzedawca wystawio faktura VAT na Klijynta — paragōnōw niy dowōmy. Jak Klijynt je firmōm, faktura idzie na firma, ale ino jak przi zamawianiu podo NIP.

3. Cyny i płacynie

3.1. Cyny w Sklepie sōm brutto, w polskich złotych (PLN), i niy majōm w sobie kosztu dostawy — tyn pokazujymy ôsobno, przed złożyniym zamōwiynio.

3.2. Za zamōwiynie zapłacisz:

a) bez system płacyń ônline PayNow — kartōm płatniczōm (Visa, Visa Electron, Mastercard, Mastercard Electronic, Maestro), BLIK-iym, gibkim przelewym ônline abo płacyniym ôdroczōnym PayPo („kup terozki, zapłać niyskorzij”, podle pkt 3.7). Podmiotym, co ôbsuguje płacynia ônline, je mElements S.A.;

b) zwykłym przelewym na kōnto Sprzedawcy, kere podōmy w potwierdzyniu zamōwiynio.

3.3. Przi zamōwiyniach na miara za co nojmyni 1000 zł Sprzedawca może zaproponować zadatek kole 30% wartości, płatny przed robotōm. Reszta pijyndzy idzie przed wysyłkōm abo wydaniym gotowego towaru. Wiela zadatku i do kiedy dopłata — to zawdy potwierdzōmy w podsumowaniu zamōwiynio.

3.4. Czas roboty przi zamōwiyniu płacōnym z gōry (cołkie abo zadatek z pkt 3.3) liczymy ôd momyntu, kiej pijōndze wpadnōm na kōnto abo płacynie przejdzie autoryzacyjo — niyważne, jak żeś płacił.

3.5. Sprzedawca niy ôdpowiado za ôpōźniynia, jak zewnyntrzny system płacyń sie zawiesi.

3.6. Jak trza bydzie ôddać pijōndze za płacynie kartōm, zwrot idzie na rachunek przipisany do tyj samyj karty, kerōm żeś płacił.

3.7. Płacynie ôdroczōne PayPo dowo PayPo sp. z o.o. Skorzystać może ino Klijynt, kery:

a) je dorosły;

b) je kōnsumyntym w rozumiyniu art. 5 pkt 1 ustawy z dnia 12 moja 2011 r. ô kredycie kōnsumynckim;

c) mo numer PESEL i miyszko w Polsce;

d) poradzi spłacić to, co bydzie winiyn PayPo;

e) dostoł ôd PayPo dobro ôcyna zdolności kredytowyj.

Ô tym, eli dostaniesz płacynie ôdroczōne, decyduje ino PayPo. Przi zakupach na firma (faktura na NIP) PayPo niy ma.

4. Robota i dostawa

4.1. Towary robimy na indywidualne zamōwiynie (miara, muster abo farba). Sprzedawca sie stara, coby robota niy trwała dłużyj niż 2 tydnie, ale bez to, że kożde zamōwiynie je inksze, termin może sie przesunōńć.

4.2. Termin może sie tyż zmiynić z przyczyn, na kere Sprzedawca niy mo wpływu (świynta, ôpōźniōne płacynie, awaryje, kurier, co sie guzdro) — ô srogich zmianach dōmy znać.

4.3. Status zamōwiynio sprawdzisz na ôsobnyj zajcie zamōwiynio pod adresōm zamowienia.artinspiro.pl/ z indywidualnym identyfikatorym — link przidzie do Ciebie w potwierdzyniu zamōwiynio.

4.4. Towar przywiezie kurier, możesz go ôdebrać samymu u Sprzedawcy po umōwiyniu terminu abo — jak sie dogodōmy — zamōntujymy go u Ciebie za dodatkowe pijōndze.

4.5. Sprzedawca niy ôdpowiado za ôpōźniynia i szkody z winy przewoźnika; jak paczka przijedzie pognieciōno, zgłoś to ôd razu, nojlepij przi kurierze, i dej nōm cynk.

5. Ôdstōmpiynie ôd umowy

5.1. Klijynt, kery je kōnsumyntym, mo zasadniczo prawo ôdstōmpić ôd umowy zawartyj na ôdległość w 14 dni bez podowanio przyczyny, podle ustawy z dnia 30 moja 2014 r. ô prawach kōnsumynta.

5.2. Tego prawa niy ma przi towarach robiōnych podle specyfikacyje Klijynta abo pod jego indywidualne potrzeby — podle art. 38 pkt 3 ustawy ô prawach kōnsumynta. Tyczy sie to przede wszyjskim:

a) szklannych tafli na indywidualno miara (tyż z musterym i jednobarwnych Lacolam),

b) szklannych podstopnic i lameli na miara poszczegōlnych stopni/elymyntōw, z wybranym musterym abo farbōm,

c) szpiglōw, szklannych połek i ôsłōnek na gniozdka na indywidualno miara abo dobranych farbōm na życzynie Klijynta,

d) ôbrozkōw na szkle z fotki ôd Klijynta abo inkszyj grafiki, kero sie wybroł,

ôraz kożdego inkszego towaru robiōnego podle miary, mustra, farby abo grafiki, kere Klijynt sōm wskozoł.

5.3. Wyjōntek: prawo z pkt 5.1 przisuguje w cołkości przi kupnie przezroczystych tafli ôchrōnnych w stałych, gotowych miarach z katalogu (bez wyboru mustra, farby i miary) — to je zwykły gotowy towar, a niy robiōny pod Klijynta.

5.4. To, że w pkt 5.2 niy ma ôdstōmpiynio, w żodyn sposōb niy rusza Twojich praw z rynkojmi za wady — kuknij do pkt 6.

6. Reklamacyje i rynkojmia

6.1. Sprzedawca ôdpowiado przed Klijyntym-kōnsumyntym za to, że towar je zgodny z umowōm, podle Kodeksu cywilnego i ustawy ô prawach kōnsumynta (rynkojmia). To prawo mosz zawdy — niyważne, eli towar wpado pod wyłōnczynie z pkt 5.2.

6.2. Reklamacyjo poślij mailym na biuro@artinspiro.pl abo listym na adresa Sprzedawcy — napisz, co sie popsuło i jak chcesz to załatwić (nojlepij z fotkami).

6.3. Sprzedawca rozpatruje reklamacyje w 14 dni ôd jejich dostanio.

6.4. Niy je powodym do reklamacyje drobno rōżnica farb, kero wychodzi z druku na szkle abo z tego, że Twōj ekran inaczyj pokazuje farby, ani rōżnice, kerych gołym ôkiym z normalnyj ôdległości niy idzie ôbejrzeć.

7. Grafiki i włosność intelektualno

7.1. Jak posyłosz włosno grafika abo fotka, sōm ôdpowiadosz za to, że mosz do nij prawa, i za ewyntualne łōmanie praw inkszych ludzi, tyż autorskich.

7.2. Tajla musterōw w galeryji je z bankōw fotek — w cynie je licyncyjo na użycie wybranyj grafiki w zamōwiōnym towarze.

7.3. Cołko zawartość Sklepu (teksty, fotki, znaki towarowe, kod) je włosnościōm Sprzedawcy abo je używano na podstawie licyncyji i je chrōniōno prawym autorskim. Kopiować i rozprowadzać bez zgody Sprzedawcy niy wolno.

7.4. Jak Sklep dō nyrzyndzie do robiynio musterōw sztucznōm inteligyncyjōm, Sprzedawca mo prawo dać tak zrobiōne grafiki do galeryje musterōw, tyż jako gotowe mustry dlo inkszych Klijyntōw.

8. Ôdpowiedzialność Sprzedawcy

8.1. Sprzedawca niy ôdpowiado za ôpōźniynia abo niyzrobiynie roboty bez rzeczy, za kere niy ôdpowiado (siła wyższo, jak pieron strzeli, awaryje dostawcōw, brak prōndu abo internetu).

8.2. Sprzedawca niy ôdpowiado za błyndy, kere wyszły z tego, że Klijynt podoł złe abo niypełne dane (tyż miary) przi zamawianiu.

9. Amyn w pacierzu (postanowiynia kōńcowe)

9.1. We wszyjskim, czego tyn regulamin niy ôgarnia, rzōndzi polske prawo, a przede wszyjskim Kodeks cywilny i ustawa ô prawach kōnsumynta. Żodne inksze!

9.2. Klijynt-kōnsumynt może załatwić reklamacyjo i roszczynia poza sōndym, tyż bez unijno platforma ODR pod adresōm ec.europa.eu/consumers/odr.

9.3. Jak sie niy dogodōmy po ludzku, spōr rozstrzygnie sōnd właściwy podle przepisōw.